Guano lambat

Aku dekat2 nak balik kijo marin , pahtu dengar tpon bunyi…aku pon akat “ Assalamualaikum..sapo ni” aku jawab.

“de ana ni…pu” Sahabat aku menjawab. Dengar soro dio sayup sayuuup jah. Tak jelah mano.

“Ho pu..guano apo brito” Aku oyak dio. Mace ado bendo peting jah.
“Ana dok rawe(rawang) loni..jumaat nati ana keno khutbah kat masjid rawe”

“Pahtu” selambe je aku jawab.

Lamo benar doh aku sain ngan sahabat aku tu ore panggil dio Ust Pu. Namo dio sebenar Mohd Saiful Azuran.

Meme teringat benar la apabilo dok ngan sahabat skali gak maso mudo2 dulu.. heheh maso mudo2 bakpo dah tuo dah ko loni tuuu.

Selinge.

Lepah aku bua metar tak di ngan ust pu dio sobanarnyo nak suroh aku g ambik dio kat stesen komuter shah alam. Aku oyak “no hal, bereh blako”

Lepah waktu kijo habih..aku ni gak pelewat la sikit. Biar agok2 de ngan komuter dio tu sapa. Aku tubik tepak kijo lebih kure pukul 6.15 pete. Direct aku g stesen.

Sapa kat stesen tu aku pon dok la bighar jale..nok nati dio ni.

Pah tengok je. Tok sapa2 jugok. Sapa la nak dekat gorib. Aku ngeluh sore “ Ai tok boleh jadi ni” guano tak sapa2 lagi ni nok hamper 1 je aku dok congok tunggu.

Time ni ore kat sejid be gorib doh. Aku pon msg la kat dio “Pu anta kat mano doh ni” aku send.

Tut..tut.. “Jap de nak dok dale keretapi doh ni, tadi dio bereti lamo sangat” dio balah.

Dale hati aku. Takpo la aku pon g smaye sura dekat tu.

Semaye2 aku g la pulok ke stesen komuter. Mengeluh aku..bakpo la komuter lambat sangat! Keno tuka wak baru ni. Aku dok fikir sore.

Pendek kan crito. Sapa jah dio. “De cepat2 de cari tandah, ana nak kecing tak di lagi ni. Aduihh” muko dio napok spoloh sen jah. Sbb dio dok okk kecing mulo2 nak naik komuter rawe lagi.

Aku eling palo. Aii sahabat aku sore ni tok habih ngan peranga lamo dio.